عالیہ ایک موٹی عورت تھی جو اکیلی ایک سنسان مکان میں رہتی تھی۔ اس کا اپنے بارے میں یہ گمان تھا کہ وہ بڑی نیک اور بھلی عورت ہے۔ وہ اکثر اپنی سہیلیوں سے کہتی، ’’میں بہت مہربان ہوں۔‘‘ لیکن صرف کہنے سے کوئی مہربان نہیں ہو جاتا۔ ایک دن ایک آدمی عالیہ کے دروازے پر آیا۔ وہ بہت غریب تھا۔ اس کے کپڑے پھٹے ہوئے تھے، بال بکھرے ہوئے اور چہرے پر پریشانی کے آثار تھے۔ اس نے عالیہ سے کھانے کے لیے کچھ مانگا۔ عالیہ غصے سے تلملا اٹھی اور دروازہ کھول کر اس پر برس پڑی: ’’دفع ہو جاؤ یہاں سے! میرے پاس تمہیں کھلانے کے لیے کچھ نہیں۔ اگر اتنے ہی بھوکے ہو تو خود محنت کرو اور کھاؤ۔‘‘ یہ کہہ کر اس نے زور سے دروازہ بند کر دیا۔ غریب آدمی حسرت سے بند دروازے کو دیکھتا رہ گیا۔ عالیہ اندر گئی، اپنے لیے چائے کا ایک گرم کپ بنایا اور مزے لے کر پینے لگی۔